النهاردة الخميس 24 / 10 كان في محاضرة تشريعات وعقود وانا حقول حاجتين مهمين
أولا
ملخص محاضرة النهاردة
ثانيا ودا الاهم
حوار خاص مع الدكتور علشان معاد المحاضرة
أولاً : ملخص محاضرة اليوم
اول شئ اكتشفتة النهاردة اول لما دخلت المحاضرة ان في ملزمة مع الناس بتوع سنة 4 باور اللي احنا بناخد معاهم فيها بعض الشئ من اللي الدكتور بيقولو .. بس الملاحظ ان الناس كلهم جايبنها
الدكتور ابتدي كلامة في الاول مراجعة بسيطة عن المحاضرة اللي فاتت اللي محضرهاش غير تلاتة بس من سيارات وعلي مافهمت ان الدكتور قسم فيها القانون الي جزئين
1- قانون عام
2- قانون خاص
والمحاضرة اللي فاتت الدكتور شرح اية هو القانون العام بالتفصيل وراجع عليها بسرعة النهاردة
وبعدين راح داخل في الجزء الجديد اللي هو اية ؟؟؟؟؟ برافو عليكو القانون الخاص
والقانون الخاص بيتقسم للأتي
القانون المدني (وهو العلاقات بين الأفراد ) - القانون التجاري - القانون الجوي والبحري - قانون العمل - قانون المرافعات -القانون الدولي الخاص ( ودا اللي الدكتور اتكلم فيه شوية كتير وقال انة هوالقانون اللي بيحدد اية هي المحكمة واية هي القوانين اللي تطبق لو كان احد طرفي النزاع أجنبي .. دا بصورة عامة وملخصة للموضوع دا ) - وضرب امثلة من القضاية اللي بتحصل علشان يقرب الصورة مش اكتر ..
ثم قسم القواعد الحاكمة الي قواعد آمرة وقواعد مكملة وقال ان القواعد الآمرة دي هي القوانين اللي مش ممكن تتغير مهما كان الاتفاق بين الاشخاص ( وضرب مثل وقال ماينفعش حد يكتب ورقة لواحد انة يقتلة ويروح يسجلها في الشهر العقاري لان اللي حيقتلة دا حياخد الاعدام بالرغم من ان اللي عايز يتقتل كاتب ورقة لان هنا في قانون آمر ) - ومن نحية تانية في قوانين مكملة وهي اللي ممكن تتغير علي حسب اتفاق الاشخاص ودي بيبقي اكترها في القوانين التجارية (بين المعلمين بتوع الأوطة يعني ) وفي بعض القوانين المدنية
وقال ان القواعد الآمرة نعرفها اما من نصها الصريح ان هيا متنفعش تتغير او من مدي سلامة المجتمع والامن العام .. المهم ركزوا في الجزء اللي جي أهم
دخل الدكتور في عنوان ماهي مصادر القانون ..
مصادر القانون هي
1 - مصادر اصلية كالتشريع والدين
2- مصادر أحتياطية مثل العورف والشريعة الأسلامية وقواعد العدالة والقانون الطبيعي
وقال ان التشريع هو قواعد مكتوبة وهي عبارة عن ثلاثة درجـــــــــات وخلي بالك من كلمة درجات مش اي حاجة تانية
الدرجة الأولي : الدستور
الدرجة الثانية : مجلس الشعب
الدرجة الثالثة : القرار اللائحي
ودي كانت المخلص المفيد لثاني محاضرة بتاريخ 24 / 10 / 2008
ثانيا الحوار بتاع معاد المحاضرة
روحنا النهاردة بعد المحاضرة نكلم الدكتور في موضوع ميعاد المحاضرة دا .. وحصل اقتراح جميل جدا ياريت الناس تقول اية رأيها قبل مانتفق مع الدكتور
كلمنا الدكتور والظاهر اننا صعبنا علية اننا نقعد البريك والتالتة يعني اكتر من سعتين علشان نستني مادة العقود .. فقالنا ان هو بيدي محاضرة التالتة كمان لانتاج وقال ان احنا ممكن نحضرها عادي بدل الرابعة والانتظار اللي بنقعدة مش بيخلي الطلبة تيجي
بس طبعا الدكتور كان لية شرط - وهو ان الطلبة كلها توافق علشان محدش يدخل عليه الرابعة من سيارات- ولاوني مش عارف اية الحكمة في كدا بس ردينا علية وقولنالو اتأكد يادكتور ان محدش حيشوف التالتة شغالة ويقعد يستني للرابعة
ودي كانت محاولة مننا علشان الناس كلها تحضر خصوصا لما سمعنا من الدكتور النهاردة ان محدش حيحل في الامتحان السنة دي الا اللي بيقعد يسمع الكلام اللي بيتقال والمناقشات
عايزين نسمع لمكانيكا سيارات صوت واختيار وآراء بقي مرة
واللي مش فاهم حاجة في المحاضرة دي يقول
الرئيسية 
اليومية
